Do im Schürhansli z'Urschebech het aus aagfange. S'Greti u der Paul Morgenthaler-Wegmüller, beidi waschächti Urschebacher, hei us Fröid am Oberaargouer-Dialäkt afo Wörter sammle. Autäglechi, urchigi, luschtigi, frächi - eifach so, wie de Urschebacher äbe der Schnabu gwachse isch. Drus isch e rächt grossi Wörterlischte worde. Us de Gschichte, wo s'Greti Morgenthaler-Wegmüller ufgschribe het, si mehreri Büecher entschtange. Dass me dä schön Dialäkt, wo nid ganz eifach zum Lääse isch, ou no cha lose, si es paar vo dene Gschichte ou no aus Hörbuech usecho.
